بی جے پی رکنِ اسمبلی شرنو سلاگر سمیت 9 افراد کے خلاف گرفتاری وارنٹ جاری
بیدر، 6 جون (ناز میڈیا ) بکری عید 2023 کے موقع پر قربانی کے معاملے میں مبینہ ہنگامہ آرائی، دھمکی آمیز رویے اور نفرت انگیز گفتگو کے الزام میں درج مقدمے میں اہم پیش رفت سامنے آئی ہے۔ بنگلورو کی 42ویں اے سی جے ایم عدالت نے باسواکلیان کے بی جے پی رکنِ اسمبلی شرنو سلاگر سمیت 9 افراد کے خلاف گرفتاری وارنٹ جاری کر دیا ہے۔ وارنٹ جاری ہونے والوں میں لنگراج، سنتوش، شیوکمار، ونود، سچن، راج کمار، شمبولنگ اور شرنبسپا بھی شامل ہیں۔
یہ مقدمہ یکم جولائی 2023 کو بکری عید کے دن پیش آئے ایک واقعے سے متعلق ہے، جس میں الزام ہے کہ شرنو سلاگر اور ان کے ساتھی باسواکلیان شہر کی ہیرے مٹھ کالونی میں واقع ایک گھر پہنچے جہاں قربانی کی جا رہی تھی۔ شکایت کے مطابق ملزمین نے گھر والوں کو قربانی بند کرنے کے لیے دھمکایا، ان کے ساتھ نامناسب رویہ اختیار کیا اور اشتعال انگیز و نفرت پر مبنی گفتگو کی۔
اس واقعے کے بعد باسواکلیان ٹاؤن پولیس اسٹیشن میں مقدمہ درج کیا گیا تھا۔ پولیس نے ملزمین کے خلاف تعزیراتِ ہند (IPC) کی دفعات 143 (غیر قانونی اجتماع)، 147 (فساد)، 448 (غیر قانونی داخلہ)، 504 (جان بوجھ کر اشتعال دلانا)، 506 (مجرمانہ دھمکی)، 298 (مذہبی جذبات کو ٹھیس پہنچانے کے ارادے سے الفاظ یا حرکات)، اور 149 (غیر قانونی اجتماع کے مشترکہ مقصد کی ذمہ داری) سمیت دیگر متعلقہ دفعات کے تحت مقدمہ درج کیا تھا۔
اب مقدمے کی سماعت کے دوران عدالت نے ملزمین کی عدم حاضری اور دیگر قانونی وجوہات کی بنیاد پر گرفتاری وارنٹ جاری کیا ہے، جس کے بعد شرنو سلاگر سمیت تمام ملزمین کے لیے قانونی مشکلات میں اضافہ ہو گیا ہے اور انہیں گرفتاری کے خدشات لاحق ہو گئے ہیں۔ سیاسی حلقوں میں بھی اس عدالتی فیصلے کو اہم پیش رفت کے طور پر دیکھا جا رہا ہے۔
NEWS & ADVERTISMENT CONTACT 9880736910
0 تبصرے