شیر خوار بچے کے ساتھ خاتون لفٹ کے گڑھے میں گر کر جاں بحق، حیدرآباد میں دلخراش حادثہ
حیدرآباد 6 جون ( نامہ نگار )حیدرآباد شہر کے خیرت آباد علاقے میں پیش آئے ایک افسوسناک لفٹ حادثے میں ایک خاتون جاں بحق ہوگئیں، جبکہ ان کی گود میں موجود شیر خوار بچہ شدید زخمی ہوگیا۔
پولیس کے مطابق خیرت آباد کی آنند نگر کالونی میں واقع بھاونا اپارٹمنٹس کی پانچویں منزل پر 58 سالہ رادھا اپنے نواسے جوئیل کو گود میں لے کر لفٹ میں سوار ہونے کی کوشش کر رہی تھیں۔ بتایا جاتا ہے کہ عمارت میں نصب یہ پرانی طرز کی آہنی گرِل والی لفٹ تھی۔
عینی شاہدین کے مطابق خاتون نے لفٹ کا دروازہ کھولنے کی کئی بار کوشش کی، جس کے بعد آہنی گرِل کھل گئی، حالانکہ اس وقت لفٹ کیبن اس منزل پر موجود نہیں تھی۔ اس صورتحال سے بے خبر خاتون نے جیسے ہی اندر قدم رکھا، وہ اپنے نواسے سمیت لفٹ کے شافٹ (گڑھے) میں جا گریں۔
حادثے کے نتیجے میں خاتون کو شدید چوٹیں آئیں اور وہ موقع پر ہی دم توڑ گئیں، جبکہ شیر خوار بچہ شدید زخمی ہوگیا۔
اطلاع ملتے ہی پولیس اور فائر بریگیڈ کی ٹیمیں موقع پر پہنچ گئیں اور کافی مشقت کے بعد خاتون کی لاش کو لفٹ کے گڑھے سے باہر نکالا۔ زخمی بچے کو فوری طور پر قریبی اسپتال منتقل کیا گیا، جہاں اس کا علاج جاری ہے۔
پولیس نے مقدمہ درج کرکے حادثے کی وجوہات کی تحقیقات شروع کر دی ہیں، جبکہ عمارت میں نصب لفٹ کی حفاظتی حالت اور دیکھ بھال کے حوالے سے بھی جانچ کی جا رہی ہے۔
NEWS & ADVERTISMENT CONTACT 9880736910
0 تبصرے