کے جی آئی ایس 2.0 سے تمام محکمے فائدہ اٹھائیں: اے ڈی سی شیوانند کرالے
بیدر17 اپریل (نامہ نگار)ضلع میں کرناٹک جیوگرافیکل انفارمیشن سسٹم (KGIS) کے جدید ورژن 2.0 کے نفاذ کے مقصد سے آج ایک اہم تکنیکی ورکشاپ کا انعقاد کیا گیا، جس میں ایڈیشنل ڈپٹی کمشنر شیوانند کرالے نے تمام سرکاری محکموں پر زور دیا کہ وہ اس جدید نظام سے بھرپور فائدہ اٹھائیں۔
یہ ورکشاپ ضلع پنچایت دفتر کے کانفرنس ہال میں کرناٹک اسٹیٹ ریموٹ سینسنگ ایپلیکیشن سینٹر، محکمہ اصلاحاتِ عملہ و انتظامیہ (ای-گورننس)، حکومتِ کرناٹک اور بیدر ضلع انتظامیہ کے اشتراک سے منعقد کی گئی۔اپنے افتتاحی خطاب میں شیوانند کرالے نے کہا کہ سرکاری منصوبوں کے مؤثر نفاذ، اثاثوں کے بہتر انتظام اور ترقیاتی کاموں کی درست نگرانی کے لیے جیوگرافیکل انفارمیشن سسٹم (GIS) نہایت اہم ہے۔ انہوں نے کہا کہ کے جی آئی ایس 2.0 کے ذریعے زمین سے متعلق اعداد و شمار، نقشے اور مختلف محکموں کا ڈیٹا نہایت آسانی اور تیزی سے دستیاب ہوگا۔اس موقع پر کرناٹک اسٹیٹ ریموٹ سینسنگ ایپلیکیشن سینٹر، بنگلورو کے ڈائریکٹر ڈاکٹر راجیش این ایل نے ورکشاپ کے اغراض و مقاصد پر روشنی ڈالتے ہوئے بتایا کہ کے جی آئی ایس کا پہلا ورژن 2016 میں نافذ کیا گیا تھا، جس کے تحت تقریباً 600 جی آئی ایس لیئرز اور 20 لاکھ سرکاری اثاثوں کی معلومات ایک ہی پورٹل پر فراہم کی گئی ہیں۔ انہوں نے مزید بتایا کہ اس نظام کے تحت 41 موبائل ایپلی کیشنز بھی دستیاب ہیں جن سے شہری اور مختلف محکمے فائدہ اٹھا رہے ہیں۔انہوں نے کہا کہ اس منصوبے کو سال 2024 میں قومی سطح پر ای-گورننس گولڈ ایوارڈ سے بھی نوازا جا چکا ہے۔ورکشاپ میں سائنٹفک افسران کروناکر سنگنابسپّا اور لکشیجی نے کے جی آئی ایس 2.0 کے تکنیکی پہلوؤں پر تفصیلی معلومات فراہم کیں۔اس موقع پر ضلع پنچایت کے اسسٹنٹ سیکریٹری شرنپا کٹپّاگول، ڈی وائی ایس پی دودپیر ملا سمیت ضلع سطح کے دیگر افسران بھی موجود تھے۔
NEWS & ADVERTISMENT CONTACT 9880736910
0 تبصرے