قرض کی رقم واپس نہ کرنے کا الزام بھارتی جنتا پارٹی کے رکنِ اسمبلی شرنو سالگر کے خلاف مقدمہ درج

قرض کی رقم واپس نہ کرنے کا الزام بھارتی جنتا پارٹی کے رکنِ اسمبلی شرنو سالگر کے خلاف مقدمہ درج

بیدر29دسمبر ( نامہ نگار) اسمبلی انتخابات کے دوران دی گئی 99 لاکھ روپے کی رقم واپس نہ کرنے کے الزام میں بھارتی جنتا پارٹی کے رکنِ اسمبلی شرناباسپا شرنو سالگر کے خلاف مقدمہ درج کیا گیا ہے۔ بسواکلیان شہر کی جئے شنکر کالونی کے رہائشی سنجوکمار سگورے نے اس سلسلے میں شکایت درج کرائی ہے۔ بنگلورو کی اے سی جے ایم عدالت کے حکم پر ہفتہ کے روز بسواکلیان سٹی پولیس تھانے میں مقدمہ درج کیا گیا۔شکایت کے مطابق، سال 2023 میں منعقدہ اسمبلی انتخابات کے دوران، جب شرنو سالگر انتخابی تیاریوں میں مصروف تھے، جنوری 2023 سے فروری 2023 کے دوسرے ہفتے تک سنجوکمار سگورے نے انہیں مجموعی طور پر 99 لاکھ روپے بطور پیشگی قرض دیے تھے۔ شرنو سالگر نے یہ قرض چھ ماہ کے اندر واپس کرنے کی یقین دہانی کرائی تھی، لیکن انہوں نے رقم واپس نہیں کی، ایسا الزام شکایت میں لگایا گیا ہے۔اس سے قبل بھی سالگر کئی بار شکایت کنندہ سے رقم لے چکے تھے اور وہ رقم واپس کر دی گئی تھی۔ اسی اعتماد کی بنیاد پر اس بار بھی قرض دیا گیا تھا۔ شکایت کنندہ اور ملزم آپس میں دور کے رشتہ دار ہیں اور اسی بھروسے پر مالی مدد کی گئی تھی، شکایت میں یہ بات درج ہے۔تاہم کئی دن گزرنے کے باوجود رقم واپس نہ کرنے پر ہراسانی کا سامنا کرنا پڑا۔ بعد ازاں 14 ستمبر کو بزرگوں کی موجودگی میں ہونے والی میٹنگ میں شرنو سالگر نے رقم دینے پر رضامندی ظاہر کرتے ہوئے ایک چیک دیا، لیکن جب وہ چیک بینک میں جمع کرایا گیا تو معلوم ہوا کہ متعلقہ کھاتہ بند ہے، ایسا شکایت میں کہا گیا ہے۔دی گئی رقم کی واپسی کے لیے جب سگورے کی اہلیہ اور بیٹا شرنو سالگر کے گھر گئے تو الزام ہے کہ رقم واپس کرنے کے بجائے ان کی اہلیہ اور بیٹے کو گالی گلوچ کی گئی اور جان سے مارنے کی دھمکیاں دی گئیں۔ شکایت میں الزام لگایا گیا ہے کہ ملزم رکنِ اسمبلی شرنو سالگر نے دھوکہ دہی کے ارادے سے یہ سب کیا۔اس واقعے کے سلسلے میں بسواکلیان سٹی پولیس اسٹیشن میں ان دفعات 74، 109، 314(4)، 318، 351(2)، 352(2)، 2، 23/2023 کے تحت مقدمہ درج کیا گیا ہے اور تفتیش جاری ہے۔