بلڈانہ میں قبائلی خاتون نے ایک ساتھ 4 بچوں کو جنم دیا
گاؤں میں طبی سہولت نہ ہونے کے باعث 27 سالہ ریانی نے بغیر ڈاکٹر کی مدد کے گھر میں بچوں کو جنم دیا
بلڈانہ9اگست ( ایجنسی )اکثر جڑواں بچوں یا بیک وقت تین بچوں کی پیدائش کی خبریں سامنے آتی ہیں، لیکن مہاراشٹر کے بلڈانہ ضلع کے قبائلی اکثریتی گاؤں چاربین میں ایک قبائلی خاتون نے ایک ساتھ چار بچوں کو جنم دے کر سب کو حیران کر دیا۔
موصولہ اطلاعات کے مطابق گاؤں کی رہائشی 27 سالہ ریانی پنشارام سستیہ نے 5 اگست کو ایک ساتھ چار بچوں، جن میں تین لڑکے اور ایک لڑکی شامل ہے، کو جنم دیا۔ حیرت انگیز بات یہ ہے کہ گاؤں میں زچگی کے لیے کوئی طبی سہولت دستیاب نہ ہونے کے باعث خاتون نے بغیر ڈاکٹر یا طبی عملے کی موجودگی کے گھر پر ہی بچوں کو جنم دیا۔ اس موقع پر گاؤں کی ایک تجربہ کار خاتون نے زچگی کے دوران اس کی مدد کی۔
چاروں بچوں کی پیدائش کے بعد جب ان کی حالت کا جائزہ لیا گیا تو ان کا وزن انتہائی کم پایا گیا۔ ابتدائی طور پر ماں اور بچوں کو طبی معائنے کے لیے جلگاؤں جامود کے دیہی اسپتال منتقل کیا گیا، جہاں ڈاکٹروں نے معائنہ کرنے کے بعد ماں اور بچوں کی حالت مستحکم بتائی۔
تاہم، چاروں بچوں کا وزن بہت کم ہونے کے باعث ڈاکٹروں نے انہیں مزید بہتر علاج اور نگہداشت کے لیے فوری طور پر ایمبولینس کے ذریعے کھام گاؤں کے سرکاری جنرل اسپتال منتقل کر دیا۔
کھام گاؤں کے اسپتال میں ڈاکٹروں کے معائنے کے دوران معلوم ہوا کہ تین بچوں کا وزن تقریباً 900، 900 اور 900 گرام جبکہ ایک بچے کا وزن تقریباً ایک کلوگرام ہے۔ کم وزن کے باعث چاروں بچوں کو ماہرِ اطفال کی نگرانی میں نوزائیدہ انتہائی نگہداشت کے یونٹ (NICU) میں داخل کیا گیا، جہاں ان کا علاج اور خصوصی نگہداشت جاری ہے۔
ریانی کی طبیعت فی الحال ٹھیک بتائی جا رہی ہے۔ بتایا گیا ہے کہ ریانی کے پہلے ہی تین بچے ہیں۔ اب چار بچوں کی پیدائش کے بعد اس کے بچوں کی مجموعی تعداد سات ہوگئی ہے۔
چار بچوں کی بیک وقت پیدائش کی خبر سے گاؤں میں خوشی کا ماحول ہے، جبکہ مقامی افراد کے ساتھ ساتھ ڈاکٹروں نے بھی اس واقعے پر حیرت کا اظہار کیا ہے۔
NEWS & ADVERTISMENT CONTACT 9880736910
0 تبصرے