ملاوٹ کے خلاف ریونت ریڈی کا بڑا قدم، سخت قانون لانے کی تیاری
حیدرآباد19جولائی ( نامہ نگار )تلنگانہ کے چیف منسٹر اے ریونت ریڈی نے ریاست میں کھانے پینے کی اشیا اور ادویات میں بڑھتی ہوئی ملاوٹ پر سخت تشویش کا اظہار کرتے ہوئے حکام کو اس کی روک تھام کے لیے جامع اور سخت قانون تیار کرنے کی ہدایت دی ہے۔
ایم سی ایچ آر ڈی میں غذائی اشیا اور ادویات میں ملاوٹ کی روک تھام سے متعلق جائزہ اجلاس کی صدارت کرتے ہوئے چیف منسٹر نے کہا کہ سبزیوں، پھلوں، دودھ اور دیگر غذائی اشیا میں ملاوٹ اور خطرناک کیمیکلز کے استعمال کے باعث عوام کی صحت بری طرح متاثر ہو رہی ہے۔ انہوں نے کہا کہ پتوں والی سبزیوں اور دودھ کو زیادہ عرصے تک محفوظ رکھنے اور پھلوں کو جلد پکانے کے لیے کیمیکلز کا بے دریغ استعمال انتہائی تشویشناک ہے۔
ریونت ریڈی نے کہا کہ کھاد اور کیڑے مار ادویات کے حد سے زیادہ استعمال کے باعث زرعی پیداوار بھی کیمیائی اثرات سے متاثر ہو رہی ہے، جس کے نتیجے میں بعض ممالک ہندوستان سے زرعی مصنوعات درآمد کرنے سے گریز کر رہے ہیں۔
انہوں نے مزید کہا کہ بازار میں نامیاتی (آرگینک) مصنوعات کے نام پر اشیا مہنگے داموں فروخت کی جا رہی ہیں، لیکن ان کی حقیقی حیثیت جانچنے کے لیے مؤثر نظام موجود نہیں ہے۔ چیف منسٹر نے حکام کو ہدایت دی کہ ملاوٹ کی روک تھام کے حوالے سے مؤثر قوانین رکھنے والے ممالک کا دورہ کرکے وہاں کے نظام کا تفصیلی مطالعہ کیا جائے اور ایک جامع رپورٹ حکومت کو پیش کی جائے۔
انہوں نے کہا کہ اس رپورٹ کی بنیاد پر ایک بل تیار کرکے اسمبلی میں پیش کیا جائے گا، جہاں اس پر تفصیلی بحث کے ساتھ عوامی رائے بھی حاصل کی جائے گی۔ چیف منسٹر نے ملاوٹ سے متعلق شکایات وصول کرنے کے لیے ٹول فری نمبر قائم کرنے کی بھی ہدایت دی۔اجلاس میں ریونت ریڈی نے ملاوٹ کے خلاف مہم کے آغاز کے لیے چیولہ (Chevella) علاقے کو پائلٹ پروجیکٹ کے طور پر منتخب کرنے کی تجویز بھی پیش کی۔
NEWS & ADVERTISMENT CONTACT 9880736910
0 تبصرے