بیدر پولیس کی بڑی کارروائی، مٹکا اور گانجا سرگرمیوں میں ملوث دو راؤڈی شیٹر ضلع بیدر
بیدر30 اگست (نامہ نگار )بیدر ضلع پولیس نے غیر قانونی سرگرمیوں کے خلاف سخت کارروائی کرتے ہوئے مٹکا جوا چلانے اور گانجا کی غیر قانونی فروخت و منتقلی میں مبینہ طور پر ملوث دو راؤڈی شیٹروں کو ضلع بدر کر دیا ہے۔ پولیس نے واضح کیا ہے کہ ضلع میں امن و امان متاثر کرنے والی غیر قانونی سرگرمیوں میں ملوث افراد کے خلاف آئندہ بھی سخت قانونی کارروائی جاری رہے گی۔پولیس کے مطابق بسواکلیان تعلقہ کے منٹھال پولیس اسٹیشن کی حدود کے بھوسگا گاؤں کے رہائشی انگد ولد ہریناتھ کامبلے کے خلاف مٹکا (او سی) جوا چلانے کے الزام میں تقریباً 11 مقدمات درج ہیں۔ پولیس کا کہنا ہے کہ وہ عوام سے رقم حاصل کرکے مٹکا جوا لکھنے کا کام کرتا تھا اور منٹھال پولیس اسٹیشن کی حدود کے مختلف دیہات میں اس غیر قانونی سرگرمی کو جاری رکھے ہوئے تھا۔پولیس کے مطابق مٹکا جوئے کی وجہ سے غریب مزدور، کسان اور چھوٹے کاروبار کرنے والے افراد زیادہ رقم حاصل کرنے کی امید میں اپنی روزمرہ کی کمائی جوئے میں لگا دیتے ہیں، جس سے ان کے مالی حالات متاثر ہونے کے ساتھ ساتھ ان کے خاندان بھی مشکلات کا شکار ہوتے ہیں۔ متعدد مقدمات درج ہونے کے باوجود انگد کامبلے کی مبینہ غیر قانونی سرگرمیاں جاری رہنے پر اسے بیدر ضلع سے رائچور ضلع بدر کر دیا گیا۔اسی طرح ہمناآباد تعلقہ کے ہمناآباد پولیس اسٹیشن کی حدود کے گھوڑواڑی کے رہائشی ایم۔ ڈی۔ شریف میاں ولد یوسف میاں ناندےڑی، جو پولیس ریکارڈ میں راؤڈی شیٹر اور ایم۔ او۔ بی۔ شیٹر کے طور پر درج ہے، کے خلاف بھی کارروائی کی گئی ہے۔پولیس کے مطابق ایم۔ ڈی۔ شریف میاں مبینہ طور پر ہمناآباد اور بھالکی شہروں میں غیر قانونی طور پر گانجا فروخت اور منتقل کرتا تھا۔ پولیس کا کہنا ہے کہ اس کی سرگرمیوں سے عام لوگوں، نوجوانوں اور طلبہ کی صحت متاثر ہونے کا خدشہ تھا۔ اس کے خلاف تقریباً 5 مقدمات درج ہونے کے باوجود مبینہ طور پر غیر قانونی سرگرمیاں جاری رکھنے پر اسے بیدر ضلع سے کوالر ضلع بدر کر دیا گیا۔بیدر ضلع پولیس نے کہا ہے کہ معاشرے میں امن و امان برقرار رکھنے اور قانون کی بالادستی یقینی بنانے کے لیے غیر قانونی سرگرمیوں میں ملوث افراد کے خلاف سخت کارروائی کی جائے گی۔ ضرورت پڑنے پر ایسے افراد کو ضلع بدر بھی کیا جائے گا۔بیدر ضلع کے پولیس سپرنٹنڈنٹ پردیپ گنٹی، آئی پی ایس نے ضلع کے عوام سے اپیل کی ہے کہ وہ کسی بھی غیر قانونی سرگرمی میں ملوث ہوکر اپنے اور اپنے خاندان کے مستقبل کو نقصان نہ پہنچائیں اور قانون کی پابندی کرتے ہوئے پُرامن زندگی گزاریں۔
NEWS & ADVERTISMENT CONTACT 9880736910
اشاعتیں
0 تبصرے