بنگلورو–میسورو ایکسپریس وے پر خوفناک حادثہ، چار افراد ہلاک، متعدد زخمی
رام نگرہ23 مارچ ( ایجنسی)کرناٹک کے ضلع رام نگرہ میں واقع بنگلورو–میسورو ایکسپریس وے پر پیر کی علی الصبح ایک دردناک سڑک حادثہ پیش آیا، جس میں چار افراد ہلاک جبکہ کئی دیگر زخمی ہو گئے۔
یہ حادثہ چنّاپٹنا تعلقہ کے سنکلاگیری گاؤں کے قریب پُٹّپنّاڈوڈی کے مقام پر پیش آیا، جب کیرالا کی نجی ٹریولس کمپنی "پی کے ٹریولس" کی ایک بس، جو کیرالا سے بنگلورو جا رہی تھی، صبح تقریباً 4:30 بجے بے قابو ہو کر ہائی وے کے ڈیوائیڈر/فینسنگ سے ٹکرا گئی۔پولیس کے مطابق حادثہ اتنا شدید تھا کہ بس کے کئی حصے بری طرح تباہ ہو گئے اور متعدد مسافر زخمی ہو گئے۔ دو افراد موقع پر ہی جاں بحق ہو گئے، جبکہ دو دیگر نے اسپتال میں دورانِ علاج دم توڑ دیا۔
مہلوکین کی شناخت محمد فرحان (22) ساکن کوئلانڈی، ضلع کوژیکوڈ (کیرالا)، درشن (45) ساکن کالاسیپالیہ بنگلورو، شاکر (27) ساکن انے پالیہ، ادوگودی بنگلورو، اور ماہی (45) ساکن پڈوچیری کے طور پر کی گئی ہے۔
ابتدائی طور پر بس ڈرائیور نے دعویٰ کیا کہ حادثہ ایک سامنے سے آنے والی گاڑی کو بچانے کی کوشش میں پیش آیا، تاہم پولیس کی تحقیقات اور سی سی ٹی وی فوٹیج کی جانچ سے یہ شبہ ظاہر ہوا ہے کہ ڈرائیور کو ممکنہ طور پر نیند آ گئی تھی، جس کے باعث یہ حادثہ پیش آیا۔ایک سینئر ٹریفک پولیس افسر کے مطابق، “ڈرائیور نے گاڑی بچانے کا دعویٰ کیا، لیکن سی سی ٹی وی فوٹیج سے ظاہر ہوتا ہے کہ وہ دورانِ ڈرائیونگ اونگھ گیا تھا۔”چنّاپٹنا ٹریفک پولیس نے ڈرائیور کو گرفتار کر کے لاپرواہی سے گاڑی چلانے کا مقدمہ درج کر لیا ہے۔دریں اثنا، زخمی مسافروں میں عبدل اور ایلین، جو کہ کننور (کیرالا) کے رہنے والے ہیں، قریبی اسپتال میں زیرِ علاج ہیں۔اطلاع ملتے ہی پولیس موقع پر پہنچی، ریسکیو آپریشن انجام دیا اور کرین کی مدد سے تباہ شدہ بس کو ہٹا کر ایکسپریس وے پر ٹریفک کی روانی بحال کر دی گئی۔واقعے کی مزید تحقیقات جاری ہیں۔
NEWS & ADVERTISMENT CONTACT 9880736910
0 تبصرے