طلبہ، والدین اور تمام شہریوں میں دستورِ ہند کا صحیح علم و شعور پیدا کرنا وقت کی اہم ضرورت ہے 26 جنوری 2026ء کے موقع پر محمد آصف الدین، چیئرمین وزڈم انسٹی ٹیوشنز بیدر کا پیغام

بیدر۔ 26 جنوری ( ناز میڈیا)یومِ جمہوریہ کے موقع پر محمد آصف الدین، چیئرمین وزڈم انسٹی ٹیوشنز بیدر نے کہا کہ ملک بھر کے اسکول انتظامیہ اور اساتذہ سے میری اپیل ہے کہ وہ یومِ جمہوریہ کو محض رسمی تقریبات تک محدود نہ رکھیں، بلکہ اس موقع کو طلبہ میں آئینی اقدار، شہری شعور اور قومی ذمہ داری کے فروغ کے لیے بامعنی سرگرمیوں کے ذریعے منائیں۔

26 جنوری 2026ء کو وزڈم کالج بیدر میں محمد صلاح الدین فرحان، سیکریٹری وزڈم ادارہ جات، اور وزڈم اسکول کے کیمپس میں محترمہ بشریٰ جمال صاحبہ، مینیجنگ ٹرسٹی نے قومی پرچم لہرایا۔ دونوں ذمہ داران نے طلبہ، اساتذہ، اولیائے طلبہ، تمام شرکاء اور عوام الناس کو 77ویں یومِ جمہوریہ کی مبارک باد پیش کی اور کہا کہ تمام شہریوں کو اپنے دستوری حقوق کے ساتھ ساتھ اپنی ذمہ داریوں (فرائض) کا علم ہونا بے حد ضروری ہے۔

اس موقع پر محمد آصف الدین نے طلبہ، اولیائے طلبہ، اساتذہ اور وطنِ عزیز بھارت کی تمام معزز بہنوں اور بھائیوں کو یومِ جمہوریہ کی مبارک باد دی اور دستورِ ہند (سمودھان) کو دنیا کے بہترین آئینی دستاویزات میں سے ایک قرار دیا۔ انہوں نے اسکولوں اور کالجوں کے ذمہ داران سے اپیل کی کہ مباحثوں، مذاکروں، نمائشوں، مضمون نویسی اور سماجی سرگرمیوں کے ذریعے دستوری اقدار اور دستورِ ہند کی کتاب کا علم ہر شہری تک پہنچانے کا باضابطہ انتظام کیا جائے۔ قومی تعلیمی پالیسی (NEP 2020) میں بھی اس پر خصوصی زور دیا گیا ہے۔

انہوں نے کہا کہ خودمختاری طلبہ کو یہ سکھاتی ہے کہ قوم کے مستقبل کی تشکیل کا اختیار عوام کے ہاتھ میں ہوتا ہے۔ سوشلزم مساوات اور دولت کی غیر منصفانہ تقسیم کو کم کرنے کا درس دیتا ہے۔ سیکولرازم تمام مذاہب کے احترام اور باہمی ہم آہنگی کو فروغ دیتا ہے۔ جمہوریت ہر آواز کی اہمیت اور اجتماعی فیصلہ سازی کی قدر کو اجاگر کرتی ہے، جبکہ جمہوریہ کا تصور یہ سمجھاتا ہے کہ قیادت وراثت سے نہیں بلکہ اہلیت اور انتخاب کے ذریعے حاصل ہوتی ہے۔

انہوں نے مزید کہا کہ انصاف سماجی، معاشی اور سیاسی زندگی میں برابری کو یقینی بناتا ہے، آزادیٔ فکر، اظہار، عقیدہ اور عبادت کے تحفظ کی ضمانت دیتا ہے، مساوات ذات، جنس یا حیثیت سے قطع نظر انسانی وقار کو برقرار رکھتی ہے، اور اخوت سماجی ہم آہنگی اور سالمیت کے لیے لازمی ہے۔

آخر میں محمد آصف الدین نے تعلیمی اداروں پر زور دیا کہ وہ یومِ جمہوریہ کو ایک ایسے پلیٹ فارم کے طور پر استعمال کریں جس کے ذریعے اچھے، باکردار اور ذمہ دار شہری تیار کرنے کے عزم کی تجدید ہو۔ انہوں نے اعلان کیا کہ وزڈم انسٹی ٹیوشنز اس مقصد کے لیے ایک ہفتہ“ہمارا حق، ہمارا دستور”26 جنوری تا 31 جنوری 2026ء منانے جا رہا ہے۔اس موقع پر ایس مدار پرنسپل، محترمہ عائشہ رضوانہ (ہیڈ مسٹریس ہائی اسکول)، جناب سلیم سر (ہیڈ ماسٹر)، محترمہ حنا کوثر (ہیڈ مسٹریس پرائمری اسکول)، مسٹر ارون کمار سر، تمام اسٹاف، طلبہ اور اولیائے طلبہ موجود تھے۔