بیدر میں سی آئی او سائنس اولمپیاڈ امتحان کا انعقاد، 155 طلبہ کا رجسٹریشن، 134 نے دیے امتحانات
بیدر، 11 اکتوبر (نامہ نگار) چلڈرن اسلامک آرگنائزیشن (سی آئی او) کی جانب سے جماعتِ اسلامی ہند، بیدر کے اشتراک سے سی آئی او سائنس اولمپیاڈ امتحان 2026 کا انعقاد اتوار کے روز وِزڈم پی یو کالج، نزد اردو ہال، بیدر میں عمل میں آیا۔ امتحان میں چھٹی، ساتویں اور آٹھویں جماعت کے طلبہ نے حصہ لیا۔ اس امتحان کے لیے مجموعی طور پر 155 طلبہ نے رجسٹریشن کروایا تھا، جن میں سے 134 طلبہ نے امتحان میں شرکت کی۔امتحان کا مقصد طلبہ میں سائنسی شعور بیدار کرنے، ان کی منطقی سوچ، مشاہدے کی صلاحیت اور تحقیقی رجحان کو فروغ دینا تھا۔ نصاب میں طلبہ کی جماعتوں کے مطابق ماحولیاتی علوم (ای وی ایس) اور سائنس کے موضوعات شامل کیے گئے تھے، تاکہ طلبہ کی علمی استعداد اور سائنسی معلومات کا جائزہ لیا جاسکے۔سی آئی او کی جانب سے منعقدہ اس تعلیمی سرگرمی کو طلبہ میں سائنسی فکر، تخلیقی صلاحیتوں اور تعلیمی مسابقت کے جذبے کو پروان چڑھانے کی ایک اہم کوشش قرار دیا گیا۔ ایسے امتحانات کے ذریعے طلبہ کو اپنی صلاحیتوں کو جانچنے اور نئے موضوعات کے مطالعے کی جانب راغب ہونے کا موقع ملتا ہے۔اس موقع پر سی آئی او کی ناظمہ انوری فاطمہ، ڈاکٹر ارشاد نوید، معاون امیرِ مقامی محمد عارف الدین اور سی آئی او آرگنائزر یاسین امین سمیت دیگر ذمہ داران موجود تھے۔تعلیمی حلقوں میں اس طرح کے مقابلہ جاتی امتحانات کو طلبہ کی ذہنی و علمی نشوونما کے لیے اہم سمجھا جاتا ہے۔ ان سرگرمیوں کے ذریعے بچوں میں سوال کرنے، مشاہدہ کرنے اور سائنسی بنیادوں پر سوچنے کی صلاحیت کو فروغ دینے میں مدد ملتی ہے۔
NEWS & ADVERTISMENT CONTACT 9880736910
اشاعتیں
0 تبصرے