پرجا سیوا ابھیان کا آغاز، مسائل 15 دن میں حل کرنے کی ہدایت
بیدر 6 ستمبر (نامہ نگار )ریاستی حکومت کی جانب سے شروع کی گئی عوامی خدمات مہم (پرجا سیوا ابھیان) کے تحت ضلع کے ہر تعلقہ اور ہر گاؤں میں سرکاری اسکیموں اور سہولتوں کو عوام کی دہلیز تک پہنچانے کے لیے خصوصی پروگرام منعقد کیے جا رہے ہیں۔ ان پروگراموں کا مقصد عوام کے مسائل کو براہِ راست سننا اور حتی الامکان موقع پر ہی ان کا حل فراہم کرنا ہے۔
یہ بات سابق وزیر و رکن اسمبلی رحیم خان نے کہی۔وہ آج بیدر تعلقہ کے جنواڑہ میں عوامی خدمات مہم کے تحت منعقدہ پروگرام کا افتتاح کرنے کے بعد خطاب کر رہے تھے۔رحیم خان نے کہا کہ حکومت کی ہر اسکیم اور عوامی فلاحی پروگرام کے فوائد دیہی عوام تک آسانی سے پہنچانے کے مقصد سے یہ مہم چلائی جا رہی ہے۔
گاؤں کے عوام کو اپنے مسائل کے حل کے لیے ضلع انتظامیہ یا مختلف سرکاری دفاتر کے چکر نہ لگانے پڑیں، اسی لیے مختلف محکموں کے عہدیدار خود عوام کے درمیان پہنچے ہیں۔انہوں نے بتایا کہ ضلع کے 40 سے زائد محکموں کے عہدیدار اس مہم میں موجود ہیں اور عوام اپنے مسائل اور شکایات براہِ راست ان کے سامنے پیش کرسکتے ہیں۔ جن مسائل کا حل موقع پر ممکن ہوگا، انہیں فوری طور پر حل کرنے کی کوشش کی جائے گی، جبکہ دیگر شکایات کے بارے میں متعلقہ عہدیداروں کو 15 دن کے اندر کارروائی کرتے ہوئے ضلع انتظامیہ اور عوام کو رپورٹ پیش کرنے کی ہدایت دی گئی ہے۔ انہوں نے خبردار کیا کہ فرائض کی انجام دہی میں لاپروائی برتنے والے عہدیداروں کے خلاف سخت کارروائی کی جائے گی۔ضلع پنچایت کے چیف ایگزیکٹیو آفیسر گوٹے مادھو وٹھل راؤ نے خطاب کرتے ہوئے کہا کہ حکومت کی یہ اہم اور منفرد عوامی خدمات مہم اس مقصد سے شروع کی گئی ہے کہ عوام کو دفاتر کے چکر لگانے کے بجائے سرکاری مشینری خود ان کے درمیان پہنچ کر مسائل کا حل فراہم کرے۔
انہوں نے کہا کہ عوام کو اپنے ہر جائز مسئلے کے حل کے لیے اس مہم سے بھرپور استفادہ کرنا چاہیے۔انہوں نے بتایا کہ ضلع میں خشک سالی جیسے حالات کا سایہ برقرار ہے اور وہ گزشتہ ایک ہفتہ سے مختلف دیہات کا دورہ کرکے عوام کے مسائل کا جائزہ لے رہے ہیں۔ 4 ستمبر کو ضلع میں 38 ہزار سے زائد روزگار کے مواقع فراہم کرنے کا کام انجام دیا گیا۔ انہوں نے کہا کہ عوام کو اپنے گاؤں ہی میں روزگار اور ترقیاتی کاموں سے فائدہ اٹھانا چاہیے اور سرکاری اسکیموں کے تحت جاری کاموں کو موثر انداز میں انجام دینا ضروری ہے۔انہوں نے مزید کہا کہ عوامی خدمات مہم کے دوران عوامی مسائل پر سنجیدگی اور ذمہ داری کے ساتھ توجہ دی جائے۔ جو عہدیدار عوامی مسائل کے حل میں مناسب طور پر تعاون نہیں کریں گے، ان کے خلاف بھی سخت کارروائی کی جائے گی۔ ضلع کی ہمہ جہت ترقی کے لیے عوام اور تمام سرکاری عہدیداروں کو باہمی تعاون کے ساتھ کام کرنا ہوگا۔ڈپٹی کمشنر شلپا شرما نے خطاب کرتے ہوئے کہا کہ گزشتہ سال بھی اسی گاؤں میں اس نوعیت کا پروگرام منعقد کیا گیا تھا۔ آج دوبارہ عوامی خدمات مہم کے ذریعے سرکاری اسکیموں اور خدمات کو عوام کی دہلیز تک پہنچایا جا رہا ہے۔انہوں نے کہا کہ دیہی علاقوں کے سڑک، نالی، کھیتوں تک رسائی کے راستوں، سروے اور دیگر مسائل کو ترجیحی بنیادوں پر حل کرنے کے لیے متعلقہ عہدیداروں کو ہدایت دی گئی ہے اور کوشش کی جائے گی کہ ان مسائل کا 15 دن کے اندر تصفیہ کیا جائے۔ڈپٹی کمشنر نے بتایا کہ ضلع پنچایت کے چیف ایگزیکٹیو آفیسر روزانہ صبح مختلف دیہات کا دورہ کرکے دیہی عوام کے مسائل کا جائزہ لے رہے ہیں۔ آج بھی انہوں نے کمل نگر گاؤں کا دورہ کیا اور وہاں عوامی مسائل کے حل کے لیے اقدامات کیے۔ آئندہ دنوں میں ضلع بھر میں عوامی مسائل کے حل کے لیے اسی طرح سرگرمی کے ساتھ فرائض انجام دیے جائیں گے۔اس موقع پر وزیر اعلیٰ ڈی کے شیوکمار کی شرکت والے عوامی خدمات پروگرام کی براہِ راست نشریات دیکھنے کا انتظام ضلع کے تمام تعلقوں میں کیا گیا تھا۔ رکن اسمبلی، ڈپٹی کمشنر، ضلع انتظامیہ کے عہدیداروں اور دیگر سرکاری حکام نے بھی وزیر اعلیٰ کے پروگرام کی براہِ راست نشریات دیکھی۔عوامی خدمات مہم کے دوران تقریباً 40 محکموں کی جانب سے اپنے اپنے اسٹال اور شکایتی مراکز قائم کیے گئے تھے، جہاں عوام سے مجموعی طور پر 400 درخواستیں اور شکایات موصول ہوئیں۔ضلع کے مختلف تعلقوں میں بھی عوامی خدمات مہم کا آغاز کیا گیا۔ اوراد تعلقہ کے سنت پور، چٹاگپّا، بھالکی تعلقہ کے بیلم کھیڑ، بیدر کے جنواڑہ، ہمنآباد کے ہلّی کھیڑ، بسواکلیان کے موڑبی، کمل نگر اور ہلسور ہوبلی میں اس مہم کے تحت پروگرام منعقد کیے گئے۔اسی سلسلے میں 8 ستمبر کو بھالکی تعلقہ کے مہکر گاؤں میں وزیر ایشور کھنڈرے کی جانب سے عوامی خدمات مہم کا انعقاد کیا جائے گا۔
NEWS & ADVERTISMENT CONTACT 9880736910
اشاعتیں
0 تبصرے