کسانوں کے مسائل فوری حل کیے جائیں: رکنِ اسمبلی پربھو چوہان کی ہدایت

کسانوں کے مسائل فوری حل کیے جائیں: رکنِ اسمبلی پربھو چوہان کی ہدایت

بیدر 2 فروری ( نامہ نگار)سابق وزیر اور رکنِ اسمبلی پربھو بی۔ چوہان نے یکم فروری کو اوراد (بی) اسمبلی حلقہ کے کھیرڈا، بھنڈارکُمٹا، ڈونگرگاؤں، کرکیاَل، ہلیال، ایکمبا، گنیش پور (ای)، جمال پور، کھنڈیکیری اور ہسی کھیر ا دیہات کا دورہ کیا۔

دیہات کے دورے کے دوران انہوں نے عوامی مسائل سنے اور شدید بارش کے باعث ہونے والے فصلوں کے نقصان کے معاوضے کی تقسیم میں مبینہ طور پر ہونے والی ناانصافیوں پر تشویش کا اظہار کیا۔ اس سلسلے میں انہوں نے متعلقہ حکام کو سخت ہدایت دی کہ فوری طور پر ان مسائل کو درست کیا جائے اور کسانوں کو انصاف فراہم کیا جائے۔

کھیرڈا (بی) گاؤں کے دورے کے موقع پر دیہاتیوں نے شکایت کی کہ موجودہ سرکاری سینئر پرائمری اسکول مندر کی زمین پر قائم ہے، لہٰذا اسکول کے لیے نئی زمین فراہم کی جائے اور مندر کی تعمیر عمل میں لائی جائے۔ اس پر رکنِ اسمبلی نے یقین دہانی کرائی کہ وہ گاؤں کی مجموعی ترقی کے لیے ہمیشہ تیار ہیں اور اس معاملے میں بھی ضروری اقدامات کیے جائیں گے۔

اس موقع پر رکنِ اسمبلی نے دیہات میں بنیادی سہولتوں، پینے کے پانی، سڑکوں، بجلی، زرعی مسائل اور دیگر ترقیاتی مطالبات پر عوام سے تفصیلی گفتگو کی اور مرحلہ وار تمام مسائل کے حل کی یقین دہانی کرائی۔ ساتھ ہی مختلف مقامات پر سڑک، پینے کے پانی، کمیونٹی ہال اور دیگر ترقیاتی کاموں کا سنگِ بنیاد بھی رکھا۔

اس موقع پر تحصیلدار مہیش پاٹیل، تعلقہ پنچایت کے ایگزیکٹیو آفیسر کرن پاٹیل، محکمہ تعمیراتِ عامہ کے اسسٹنٹ ایگزیکٹیو انجینئر پریم ساگر، پنچایت راج انجینئرنگ محکمہ کے اسسٹنٹ ایگزیکٹیو انجینئر سنیل چِلرگے، جیسکام کے اسسٹنٹ ایگزیکٹیو انجینئر روی کارباری، سی ڈی پی او اِملپا، مقامی قائدین شیواجی راو پاٹیل مُنگنال، شیوراج الماجے، سچن راٹھوڑ، یوگیش پاٹیل، سچن بیرادار، انیل بیرادار اور دیگر افراد موجود تھے۔